بۆ گشت بەرپرس و کەسایەتییە دیارەکانی ڕۆژهەڵاتی کوردستان “تکایە ئەم خاڵانە لە بەرچاو بگرن”

① کەسی بچووکی فارس و بیانی، بە سەر نەتەوەی کوردەوە گەورە مەکەن. کەسی بێناوی فارس لە نێو میدیا و کۆمەڵگای کوردستاندا ناودار مەکەن.

② لە ڕووبەڕووبوونەوەی میدیایی و کۆبوونەوەکاندا، یەکسەر وڵامی قسەی نەشیاویان بدەنەوە. چونکە بێدەنگی تۆ لە پێشچاوی ئەو! بچووکی خۆت و نەتەوەکەت پێشاندەدا.

③ بە کەسی *هەواڵکڕو هەواڵفرۆش* دڵخۆش مەبن. ئەوانە زیان بە پێگەی نەتەوەیی دەگەیەنن.

④ لە ئاست خوشک وبرای هاووڵاتی خۆت لووتبەرز مەبە، بەڵام بۆبێگانەش سینگ فراوان مەبە.

⑤ شانازی بەو کەسایەتی و چالاکوانانەی وڵاتی خۆتەوە بکە کە بوێرانە باس لە ناسنامەی نەتەوەکەت دەکەن، نەک ئەوانەی پێنەوپەڕۆی سیاسەتی داگیرکەران دەکەن.

⑥ لە کۆنگرەو کۆنفرانسەکانی تایبەت بە گۆڕانکاری لە ئێراندا، ڕێگە مەدە هیچ کەس و ڕێکجراوێکی فارسی بە نوێنەرایەتی تۆ قسە بکات، ئەوان بۆ مانەوە لە دەسەڵات، سەدان بەڵێنی ناڕاست و بێکردەوەییمان پێدەدەن، بەڵام لە کاتی بە هێزبوونیشدا پەلامارمان دەدەن.

⑦ هەرگیز گاڵتە بە فەرهەنگ، ئایین وپێکهاتەی کۆمەڵایەتیەکانی خۆتان مەکەن. ئەوانە بوونەتە پێناسەو مێژووی نەتەوەیی تۆی کورد، ئەگەر تۆی دەسەڵات و لایەنی سیاسی ئەوانە بە کەم بگریت، نەیار و داگیرکەر لەو ڕێگەوە ئاژاوە دەخاتە ماڵی کوردەوە.

⑧ هەرگیز شانازی بەئیمپراتۆری درووستکراوی نەتەوەی داگیرکەر مەکەن، کە پڕە لە دزینی مێژوو فەرهەنگ وسامانی خۆمانەوە. چوون هەر جۆرە گەورەنواندنێکی ئەوان! واتای مەترسی و چەوساندنەوەیە بۆ تۆی کورد و نەتەوەکانی دیکەی غەیرە فارس.

⑨ بۆ یەکگرتوویی و کاری هاوبەشی کوردستانی، بڕوبیانوی زۆر بۆ هاووڵاتییەکەت مەهێننەوە. لەگەڵ ڕێکخراوە بچووکەکانی فارسەکاندا بە پەلە واژۆی کاری هاوبەش مەکە.

⑩ گاڵتە بە خەباتی سەربەخۆیی نەتەوەکەت مەکە، بە ئاوات وخەیاڵی مەزانە، ئەوەتە ساڵانە بینەرو بیسەری ڕاگەیاندنی دەوڵەتی نەتەوەی زۆر بچووک وکەمناوین لەئاست گەورەیی کورد. دوا نموونەش (سۆمالیلاند)ە. تۆی کورد بە س لە ڕۆژهەڵاتی نیشتمان ١٥ملوێن کەسی.

عارف باوەجانی