باوکی کاک عارف باوەجانی سەرۆکی پارتی سەربەستیی کوردستان کۆچی دوایی کرد. بەڕێزیان بە شێوەی خوارەوە هەواڵەکەی ڕاگەیاندووە.
…………………
إنا لله وإنا إليه راجعون
باوکمان کۆچی دواییکرد. والدي توفي My father has passed away
بە ناوی خوای گەورە و میهرەبان
بە ناوی گشت ئەندامانی بنەماڵەکەمانەوە، بە دڵێکی پڕ لە خەم و پەژارەوە ڕادەگەیەینم کە باوکمان (حاجی تۆفیق ئەحمەدی) لە تەمەنی ٨٥ ساڵی، ئەمڕۆ ٥ی خاکەلێوەی ٢٧٢٦ی کوردی، بەرامبەر بە٢٥/٣/٢٠٢٦ی زاینی، لە نەخۆشخانەی جوانڕۆی ڕۆژهەڵاتی کوردستان، بۆ هەمیشە ماڵئاوایی لێکردین وکۆچی دوایی کرد.
باوکمان حاجی تۆفیق وەک زۆربەی باوکە زەحمەتکێشەکانی دیکەی کوردستان، لە ژیانیدا تووشی زۆر کوێرەوەیی، ئاوارەیی و نەهامەتی بووە، بەڵام ناخۆشییەکانی ژیانی نەیانتوانیوە بە چۆکیدا بهێنن و، هەمیشە سەربەرزانە لەگەڵ کۆسپەکانی ڕۆژگار بەربەرەکانی کردووە.
لە ساڵی ١٩٨٨ کوڕێکی بە ناوی ڕەسوڵ ئەحمەدی لە تەمەنی ١٦ساڵی و، لە ساڵی ١٩٩٢ ئامۆزایەکی بە ناوی مامۆ خوسرەو ئەحمەدی، لە ڕیزەکانی حیزبی دیمۆکرات لە پێناو کوردستاندا شەهید بوون. هەروەها سێ کوڕەکەی دیکەی تا ئێستاش لە خەبات و تێکۆشاندان لە پێناو ڕزگاری کوردستاندا بەردەوامن.
حاجی تۆفیق ئەحمەدی جارێکی دیکە لە کۆتا مانگی زستانی ٢٠٢٥ لە وڵاتی نەرویجەوە گەڕایەوە بۆ نێو بنەماڵە و کەس و کارەکەی لە سەلاسی باوەجانی لە ڕۆژهەڵاتی نیشتیمان، بەڵام بە داخەوە بە هۆی هەڵکشانی تەمەن و لێدانی سەکتەی مێشک، ئەو سەفەرەی وەک دوا سەفەری بێگەڕانەوە بوو بۆ لای مناڵ و نەوەکانی لە وڵاتانی نەرویج و سوید. ئەو بۆ هەمیشە ماڵئاوایی لە مناڵەکان، برا و برازا، خوشک و خوشکەزا، ئامۆزا و سەدان کەسی دیکە لە خزم و ئەندامانی بنەماڵەکەشی لە ڕۆژهەڵاتی کوردستان کرد و، هەموومانی بەو کۆچە خەمبار کرد.
خوای گەورە سەبووری هەموومان بدات..
ڕۆحت شاد باوەکە گیان. گەردنمان ئازاد بکە، کە نەمانتوانی لە بە خاکسپاردن و مەجلیسی پرسەی ناو خزمان لە زێدی خۆمان بەشدار بین.
عارف باوەجانی
تێبینی:
لە ڕۆژانی داهاتوودا کات و شوێنی بەڕێوەچوونی ڕێوڕەسمی سەرەخۆشی، لە دەرەوەی وڵات و کوردستان، ئاگادارتان دەکەینەوە.
………………………
ناوەندی ڕاگەیاندن و ڕۆشنبیری پارتی سەربەستیی کوردستان، پرسەو سەرەخۆشی ئاراستەی سەرۆکی گشتی پارتیمان کاک عارف باوەجانی و سەرجەم ئەندامانی بنەماڵە تێکۆشەرەکەیان دەکات.
