(دەنگی پێی سەربەخۆیی) ئازاد جندیانی لە كتێبێكی شیكاریی هزری سیاسی تازەدا
كتێبێكی تازەی نووسەر و سیاسەتوان ئازاد جندیانی كەوتە بەر دید و هزری خوێنەران، ئەگەرچی كتێبەكە بە قەبارە گەورە نییە بەڵام بە هەژموون و گوزارشت زۆر قووڵ و گرنگ و گەورەیە، كتێبەكە بابەتێكی شیكاریی فكری سیاسییە.
(جندیانی) لە كتێبە تازەكەیدا، دوو سەردەمی جیاواز شڕۆڤە دەكات و شیكاری مێژوویی و سیاسی و جیۆسیاسی و كۆمەڵایەتی بۆ دەكات، لەڕێی بەستنەوەو هاوتاكردنی ڕووداوەكانی سەردەمی هەردوو پەیماننامەی (سیڤر و لۆزان) بە ڕووداوەكانی ئێستای كوردستانی مەزن و ڕۆژهەڵاتی ناوەڕاست، لە میانی باسكردن و بەراوردكردنی هەردوو سەردەمدا جندیانی جگە لە تێزەكانی نووسەری بەڕەگەز تورك و دۆستی كورد (ئیسماعیل بێشكچی) و كتێبە دانسقەكەی (كوردستان، كۆلۆنیۆلی نێودەوڵەتی)، پەنا بۆ هیچ تێز و نووسەرێكی ئەوروپی و ئەمریكایی و عەرەب نابات، كە تێزە باو و سواوەكانیان جگە لە سەرلێشێوان و قووڵكردنەوەی ڕووحی تەسلیمبوون بەو بارە داگیركارییەی كە زلهێزەكان لەكاتی هەردوو جەنگی جیهانی و دواتریش جەنگی ساردەوە بەسەر نەتەوەی كورد و نیشتمانی كوردستانیان سەپاند و بە بەرچاو و بەسەرپەرشتی هەردوو ڕێكخرای كۆمەڵەی گەلان (عصبة الامم) و ڕێكخراوی نەتەوە یەكگرتووەكان، كە جندیانی ڕەخنەی تووند لەهەردوو ڕێكخراو دەگرێ و بە كەمتەرخەم و تاوانباریان دەناسێنێ بەرامبەر بە نەتەوەی كورد و نەتەوەكانی تری دونیا كە خاوەنی دەوڵەت نین.
كاك ئازاد، دوای خوێندنەوەی ورد و بەراوردكاری بۆ هەردوو سەردەم، پێی وایە كە نەتەوەی كورد لەسەردەمی ئێستا زۆر جیاوازەو زۆر ئامادە و بەهێزترە بۆ وەدەستهێنانی مافە نەتەوەییەكانی كە خۆی لە سەربەخۆیی و دامەزاندنی دەوڵەتدا دەبینێتەوە، (جندیانی) لەپرسی بەهێزی و لاوازی ئێستای كورد بەڕوونی تێزێكی تازە دەخاتەڕوو كە بەتەواوی پشت لە خاڵە لاوازەكان دەكات و ڕووی لە خاڵە بەهێزەكانە و نووسیوویەتی :
(کە باس لە بەهێزیی کورد دەکەین لەمڕۆدا، پترمەبەستم وەڵامدانەوەو ڕەتکردنەوەی ئەو تێز و بگرە ئەو پڕوپاگندانەیەیە، کە کورد لەبێهێزیدا دەبینن و بانگەشە بۆ بێهێزی کورد دەکەن، لەڕاستیدا لەم قۆناخەدا کوردیش وەک ژمارەیەکی زۆر لە نەتەوە و قەوارەی دەوڵەتی و خوار دەوڵەتییەکاندا خاڵی لاوازی هەن، بەڵام بە بۆچوونی من لەئێستادا دەبێ فۆکس بخرێتە سەر خاڵ و فاکتەرە ڕاستەوخۆ و ناڕاستەوخۆکانی بەهێزی کورد.)
ئازاد جندیانی، ڕۆشنایی زیاتر دەخاتە سەر پرسی بەهێزی كورد و چونییەتی وەبەرهێنانی ئەو بەهێزییە لەپێناو سەرخستنی دۆزی ڕەوای كورد لە هەر چوار پارچەی داگیركراوی كوردستاندا، ئەو بەهێزییەش دابەش دەكاتە سەر شانزە خاڵ كە هەر شانزەیان بەوردی باس لە بوار و جومگە هەمەچەشن و فرە ڕەهەندەكانی بەهێزی كورد دەكات.
بێگومان (جندیانی) لە خستنەڕووی بابەتەكەیدا بەشێوەی سۆز وعاتیفەی ڕووكەشانە شڕۆڤەی ڕووداو و پێشهاتەكان ناكات، بەڵكو بەهزری قووڵی سیاسییەوە بە هەموو ڕووداوەكانی ئێستای دونیا و پێشهاتەكانی ئەم دواییەی ڕۆژهەڵاتی ناوەڕاستیش دەیبەستێتەوە بەهەموو ئەگەر و لێكەوتەكانیەوە.
جندیانی، لەدوا لاپەڕەی كتیبەكەیدا بە (كۆئەنجام) كۆتایی پێدەهێنی جەخت لەوە دەكات كە نابێ كورد دەستەوئەژنۆ چاوەڕوانی دەرەنجامی ڕووداوەكان بكات و نووسیوویەتی:
(ئێستا هەموو کەس و لێکۆڵەر و شارەزایانی دۆخە نێودەوڵەتی و جیهانی و هەرێمایەتییەکە ئەو ڕاستییە دەزانن چاوەڕوانیشن، کە گۆڕانێکی قووڵ و دنیاهەژێن بەڕێوەیە و کوردستانیش لەدەرەوەی ئەو گۆڕان و دۆخانەدا نییە و ناشکرێ خۆی وا ببینێ، کە ئەو لەو بۆمەلەرزە و بگرە لە تۆفانەکەوە دوورەو بە خۆپارێزی دەیباتەوە، لە کاتێکدا خۆپارێزی و خۆبەدوورگرتن و چاوەڕوانیکردنی ڕووداوەكان لەدەرەوەی خۆمان (بژاردەیەکە لە نێوان هیچ و هیچدا)، لەکاتێکدا فاکتەرەکانی بە هێزی کورد لە ئەمڕۆدا لەو ئاستە دایە كە کورد لەم دۆخەدا لەناوچەکە ئەکتەرێکی بەدەسکەوت بێ، هەڵسەنگاندن ولێکدانەوەی من ئەوەیە، کە ئەوەی دەیبینم و هەستی پێ دەکەم، دەنگی پێی سەربەخۆییە!).
ئەم كتیبە دانسقەیەی كاك ئازاد و خستنەڕووەكانی زۆر ناوازەو نوێن و شایانی ئەوەیە، دڵسۆزانی كورد لە هەر پارچەیەكی داگیركراوی كوردستان و دیاسپۆڕا دابن، بیخوێننەوە، كە لەڕاستیدا تێزەكانی فاكتەرێكی جوان و باشن بۆ خۆ بەهێزكردن و ڕەتكردنەوەی تێزی خۆ بە هیچ نەزان و لاوازی.
